الاتحاد عميـد والهـلال زعيـم وكلهـم على العين والراس لكن اللي حصل في مباراتهـم اللي فاتت من أخطاء تحكيمية وبسببها اتغيرت أحداث كتيرة في المباراة يعني لو قلنا انه انطرد أسامه المولد كانت أشياء كتيرة اتغيرت في المباراة، ولو قلنا انه اللاعب الكوري كمان انطرد كان برضو في أشياء كتيرة كانت حتغير في مجرى المباراة خاصة في نتيجتها اللى ما كان يتوقعها أكتر المتفائلين لكن الله يسامح صالح الهذلول جاب الغايبة وسكت وطنش عن أخطاء قانونية تحكيمية بديهية وحسبها أخطاء تقديرية لو كان في حكم مبتدئ كان حسبها وأعطى كل فريق حقه القانوني فما بالكم بصالح الهذلول اللي معلق على صدره شارة الفيفا الدولية، على العموم انتهت المباراة بخيرها وشرها ومبروك للهلال وهاردلك للاتحاد، وخلونا دحين نشوف ايش بيقول مقالنا حق اليوم .. دحين انت ياسيدي كل ما تـروح المركاز حقتك ده اللي في كيلو 2 ترجـع حالتك حالة وريحتك كده معفنة كأنك خارج من مسلخ ؟ والله يا بنت الحلال الحالة دي والريحة دي مو أنا لوحدي اللي بشتكي منها هادي الروائح الكريهة بيشتكي منها كل السكان وأصحاب المعارض والدكاكين الموجودين في كيلو 2 ، بالله عليكي في أحد عاقل عنده بصر وبصيره يترك مسلخ وسط الحي بيندبح فيه كل أنواع الأغنام والأبقار والجمال وبعد الدبح شوفي عاد كمية المويات المعفنة والقاذورات والروائح الكريهة اللي بتخرج من ده المسلخ ومن براميل القمايـم الموجودة جنبو واللي بيرموا فيها كل القاذورات اللي بتخرج من هادي الدبايح، هدا المسلخ اللي اسمه مسلخ السبيل النموذجي المفروض يكون مكانه بـره العمـران مو وسط البلد الرايـح والجي.. يتضجر منه كتير من السكان بيشتكوا وبيتكلموا من وجود هدا المسلخ وسط حيهـم العتيق واللي بيعرفه أغلب سكان جدة لكن محد معبرهم واعطوهم طناش، هدا غـير الفوضى والإزعاج والحراج اللي بيصير في ده الحي من المحرجين سواء كانوا من المقيمين النظاميين أو من العمالة المتخلفة واللي يبيعوا ويشتروا في الاثاث المستعمل واللي بيسببه يتقفل الشارع وتزيـد الفوضى والزحمة فيه بسبب وجود سياراتهم اللي بتشيل وتحط كل أنواع الاثاث، يعني الشارع بالعربي كده يصير فوضى ما بعدها فوضى .. عشان كده نتمنى من المسؤولين في الأمانة انهم يشوفوا حل لهادي الفوضى واللي بتصير في سوق كل 2 وتحاول قد ما تقدر انها تنقل ده المسلخ اللي بيقولوا عليه انه نموذجي وهوه في الأصل لا نموذجي ولا يحزنون، هدا المسلخ جاب العفن والقرف للشارع وللحي وللعالم اللي ساكنين فيه .. وتحياتي وتقديري لجميـع الحبايب من القـراء والقارئات وأشوفكم بعد إجازة عيد الأضحى المبارك .. وكل عام وانتو بخير وصحة وسلامة قبل الزحمة .. وعيشوا كتيييييير تشوفوا كتييييييير.